عن شمس

عن شمس

1

حبيبتي زى شمس الصيف ماتقدرش تستحملها مدة طويلة ، لكن برضه ماتقدرش تستغنى عنها خالص لإنك عارف إن الشتا جى.

 2

عمركم شفتم شمس خضرة .. أنا بقى شفت لما بصيت فى عيون حبيبتى كانت شمسها هناك … هناك .. بعيدة قوى .. قاعدة فى ركن ضيق جدا .. جوا بحر عينيها الأزرق .. نقطة .. مجرد نقطة خضرة لكن ليها كل حرارة شمس فى عز شبابها … تدفى وتلسع وتولع من غير ماتلمسها ..

3

النهارده نار الغيرة لسعت قلبى لما شفتها لبسه قميص النوم الوردى وواقفه فى البلاكونه تنفض السجاده انا دخلت البيت بسرعه وشخطت  فيها .. ضحكت ومدت ايدها لمست جلدى … كهربا والله العظيم كهربا .. انا وقعت من طولى ع الارض .. بالليل جه الدكتور ونصحنى بالراحة لانى خدت ضربة شمس.

 4

عمركم لحستم بلسانكم كاس مليان ثلج فى عز نار الصيف .. ياه ساعتها حسيت انى فى الجنة وبقى نفسى افضل على الحاله ده لإنى كنت عارف إنه فى النهاية هقدر اتصور ربنا وأوصل له كأى صوفى.

 5

النهاردا أنا سندت راسى على صدرها وبدأت أحكى لها عن كل إللى قابلنى فى حياتى،  خطرفة ، مجرد خطرفة..  حكيت لها عن أمى إللى خطفنى الموت من حضنها ورمانى فى حضن الوحدة ، والأصدقاء إللى وقعوا فى الطريق واحد ورا واحد من غير ما حد منهم يعلم فى قلبى أو أعلم فى حياته ، وضحكت لما لقيت بحر عينيها غير اتجاهه وبدأ يحفر فى خدها الناعم مجرى جديد ، وحضنتها وبدأت أنا كمان أحفر بحرى فى خدها ، وأضمها ضمتها لحد ما حسيت إن حرارة صدرها نشفت دمع قلبى.                                              6   
عمركم شفتم لحم مشوى من غير نار..  أنا بقى شفت .. أنا بقى دقت .. لما عرت صدرها وسابته حر فقعد يسحب ويقرب لحد ما بقى طُعم شابك بين سنان مش قادرة تخلص من الشص ولا عايزه تنسى الطَعم.
                                            7
النهاردا قادت فى قلبى حريقة ، رجل المطافى إللى لجأت إليه فى نص الليل … صرخ قاللى أنت عبيط ، إزاى تحضن النار وأنت من غير هدوم .. أنا سكت ، ما أنا كان لازم أحضن النار انشالله أموت بعد كدا … كتب لى مرهم أطفى بيه نار قلبى .. قاللى أدهن بيه إذا اضطرتك الظروف إنك تحضن الشمس .. أنا عارف إن لما الشمس بتجتحنى ما بيكونش عندى القدرة إنى حتى أصد صهدها ، أو أفكر فى البعد عنها ،  فإزاى هدهن قلبى مرهم قبل ما أخش معاها السرير 
                                           8
أحنا اتخنقنا ليه الليلة ده ، مش عارف ، لكن بيتهيألى إنى رجعت الليلة ده متأخر شوية ، واتهيألى برضه إنها كانت سهرانة طول الوقت دا مستنيانى ، واتهيألى إن اجابتى عن سؤالها عن سبب تأخيرى معجبتهاش ، ومتهيألى إن دا كان سبب الخناقة إللى قامت الليلة ده ، وإللى انتهت بإنى قضيت طول الليل من غير نوم قاعد على كنبه الصالة ، بولع فى سجاير محروم من حرارة الشمس ، وهى نايمه جوه على السرير بتشخر.
                                         9
حبيبتى زى شمس الصيف  .. الصيف بحر أزرق ،ورملة صفرا ، وشمس تخلى كل دا جميل لكن سخن .. سخن جدا .. ماتقدرش تستحملها مدة طويلة .. لكن برضه ماتقدرش تستغنى عنها خالص لإنك عارف إن ثلج الشتا إللى بيتراكم فى قلبك ،ومطر عينيك إللى دايما بيهطل فى حاجه لشمس تسيحه وتنشف ميته.